Prinsenpaar 2024
Leef luuj,
Eindelik maog ’t gezag weare: veer zeen de prins en prinses van de Lombokkers veur ’t kommende seizoen. Toen veer gevraogd waerde om prins en prinses van de Lombokkers te waere, koosjte veer niks angesj es van bliedsjap sjreave.
Ich bin Koen Hornesch, zoon van Alex en Angelique en breurke van Aniek. Ich bin 23 jaor oud en woon op de kanaalweag in Nattenhaove.
Ich wèrk es chemisch fysisch analist bie BRB international in Ittervoort. In miene vrieje tied bin ich te vènje bie de sjlaagwerkgroep van hermenie Sint Joseph Berg aan de Maas en houw ich op de dikke trom bie Einrichting.
Verder ben ich auch op ein aantal vriedig aovende te vènje es begeleider bie de BBJ (Bergse Brök Jeug). Hie begeleid ich de tienergroep, zodet zie leuke sjpelkes kènne sjpele of op ein leuk uitje kènne gaon.
Mesjien kent g’r mich waal es vrijwilliger bie Augst. Hie boew ich mit aan de wage veur de buurt Nattenhaove. Auch help ich bie Berg Broesj, same mit mien prinses. Hie zörge v’r d’r noe al ein aantal jaor veur dat de auwere luuj eine sjaone middig maoge beleave.
Es letste zit ich in de sinterklaoscommissie, wo ich mit alles regel, zodat Sinterklaos en zien pieten elk jaor aan kènne kome in Berg.
Vreuger vierde ich carnaval in Gelean mit de hermenie van dao, daonao mit vrunj in Sittard en natuurlijk in Berg. Al jaore loup ich mit de hermenie van Berg mit in de optoch.
Toen ich Sanne leerde kenne, merkte ich metein dat zie heel erg van vastelaovend hult. Dat waar super fijn natuurlik. Toen heur breurke jeugprins woart, begoosj ’t bie os te kriebele om zelf prins en prinses te waere. Teruk dinkend aan vreuger wo mien zus in 2006 prinses is geweas op de basissjool en mien nonk en tante in 1987 ’t prinsenpaar waare van de Smautbulen, wilde ich auch gear dit avontuur aan gaon. Toen veer dan auch gevraog woarte es prinsepaar, koosjte v’r dan auch niks angesj dan metein jao zegge.
Ich bin Sanne Vos, dochter van Maurice en Nicole en zus van Jitze. Ich bin 20 jaor oud en woon in Einekoeze.
Ich wèrk es onderwijsassistent op de basissjaol in Genhout. Neave mien werk volg ich de opleiding Pedagogisch educatief professional. In miene vrieje tied sjpeel ich tuba bie (jeug)fanfaar Concordia Einekoeze en bie kapel Neuge pils en eine sjoes. Bie de jeugfanfaar zit ich in ’t besjtuur, wo ich auch penningmeister bèn. Onger angere organisere v’r activiteiten veur de jeug.
In mien zomervakantie bèn ich ein weak te vènje bie Kindervakantiewerk LEG. Hie begeleid ich ein groep kènjer, zodet zie ein leuke weak kènne beleave.
Ich kin mich niks angesj herinnere den dat ich vastelaovend vier. Vanaaf dat ich gebaore bèn mit in de optoch in Göttekaove, wo v’r zelf ozze pakke neijde, later mit de fanfaar van Einekoeze mit.
Al van kleins af aan druimde ich om prinses te weare. Dit is dan auch neet gek. Mien mam waor jeugprinses in 1986 bie de Tuurhouters. En mien breurke is in 2020 jeugprins geweas van de Smautbulen. Helaas werd ichzelf vreuger oetgelaot om jeugprinses te weare, mer noe kump miene druim eindelik oet es graote prinses.
Veer weite zeker dat v’r mit uch alle ein sjaon seizoen gaon make. V’r houpe uch dan auch te zeen bie de activiteite van de Lombokkers, loupend in d’n optoch of langs de kèntj van de route.
Alaaf,
Prins Koen 1e en Prinses Sanne